poetry & sms

 Aankhein tanha ho jaati hain
Dard ka sehra ho jaati hain

Dil ka kya hai dil ki baatein
Aksar ruswaa ho jaati hain

Tu hota hai laiken shaamein
Kaisay tanha ho jaati hain

Teray bin yeh chandni raatein
Ghum ka naksha ho jaati hain

Asal ki janib laut kay akhir
Naslein ik ja ho jaati hain

Kyun har baar safar ki shamein
Tera chehra ho jaati hain

 Hawa ko awara kehne walon
Kabhi tu socho kabhi tu likho
Hawayein kyun apni manzilon se bhatak gayi hain
Na unki aankhon main khawab koi
Na khawb main intezaar koi

Ab unkay saaray safar main subhay yaqeen koi
Na shaam-e-sada aitbar koi
Na unki apni zameen koi na aasman per koi sitarah
Na koi mausam na khushboo ka istaara
Na roshni ki lakeer koi na unka apna safer koi
Jo unkay dukh per kitaab likhay
Musafirat ka azaab likhay
Hawa ko awaara kehnay walon
kabhi tu socho!

Sabhi jazbay badaltay ja rahay hain
Kay jaisay khawab martay ja rahay hain

Koi dil kay liye dil kay makin ko
Nazar andaaz kartay ja rahay hain

Jo dil ka haal hai dil jaanta hai
Bazahir tu sambhaltay ja rahay hain

Chalay tu hain tumharay sheher say hum
Kaaf-e-afsos maltay ja rahay hain

Kabhi jin main guroor-e-tazgi tha
Who khado khaal dhaltay ja rahay hain

Mohabbat ki aseeri se rehayi mangtay rehna
Buhut asaan nahiin hota judayi mangtay rehna

Zara sa ishq karlena zara si aankh bhar lena
Phir us kay baab main saari khudayi maangtay rehna

Kabhi mehroom honton per dua ka hurf rakh dena
Kabhi wehshat main uski narsayi mangtay rehna

Wafaon kay tasalsal se mohabbat ruth jaati hai
Kahaani main zara si bay wafayi mangtay rehna

Ajab hai wehshat-e-jaan bhi kay adat ho gayi dil ki
Sukoot-e-sham-e-ghum se hum navayi mangtay rehna

Kabhi bachay ka nanhe haath per titli kay per rakhna
Kabhi phir us kay rangon say rehayi mangtay rehna